Fylgni mjólkurneyslu við krabbamein

Það var birt áhugaverð grein í Morgunblaðinu um daginn um fylgni mjólkurneyslu og krabbameins í blöðruhálskirtli.

Oddur Benediktsson skrifaði greinina, en hann er formaður krabbameinsfélagsins Framfarar.

Það helsta sem kemur fram í greininni er að sífellt fleiri rannsóknir benda til að það séu tengsl á milli blöðruhálskirtilskrabbameins (BHKK) og neyslu á mjólkurvörum.

Ef borin er saman mjólkurneysla eftir svæðum í heiminum og dánartíðni af völdum BHKK kemur í ljós gríðarlegur munur eftir svæðum. Í Austurlöndum er langminnsta mjólkurneyslan og þar er langlægsta dánartíðnin.

Lönd í suður-Evrópu neyta níu sinnum meiri mjólkur og er dánartíðnin fjórum sinnum hærri en í Austurlöndum.

Norðurlöndin eru svo með langmestu mjólkurneysluna eða 13 sinnum meiri en á Austurlöndum og er dánartíðnin líka níu sinnum hærri.

Brjóstakrabbamein og ristils- og þarmakrabbamein sýna einnig markverða fylgni við mjólkurneyslu.

Margir fræðimenn hafa hvatt fólk til að hætta allri neyslu á mjólkurafurðum ef það greinist með eitthvað af þessum tegundum krabbameins og aðrir ráðleggja fæðuval sem líkist austurlensku mataræði.

Oddur talar um að ekki hafi fundist óyggjandi skýringar á því hvers vegna krabbamein á Norðurlöndum er meðal þess hæsta sem gerist í heiminum en að óneitanlega sé margt sem bendir til að mjólkurþambið skipti þar sköpum. “Einstaklingur sem þambar allt að lítra af mjólk á dag fær mjög háan umframskammt af alls kyns vaxtarhormónum og efnum sem ætluð eru kálfum til vaxtar, en ekki mannfólki sem komið er af barnsaldri.”